آمريڪا ۽ سوويت يونين جي وچ ۾ 31-جولاءِ 1991ع تي ٿيل ٻه-طرفو ٺاهه، جنهن ۾ ٻنهي ملڪن وٽ موجود 1600 جهازن، ميزائيلن ۽ ٽوٻر سامونڊي ٻيڙن تي 6000 کان وڌيڪ ائٽمي هٿيار لڳائڻ تي بندش مڙهي وئي. هي معاهدو انساني تاريخ جو سڀ کان وڌيڪ ڳُوڙهو ۽ وڏو مُذاڪراتي سلسلو هو. ان جي لاڳو ٿيڻ سان 2001ع تائين موجود 40 سيڪڙو ائٽمي هٿيارن جو خاتمو ممڪن ٿيو. ائٽمي هٿيار گهٽائڻ جي حوالي سان ٻنهي ملڪن وچ ۾ ٿيل اتفاق سبب تڏهوڪي آمريڪي صدر رونالڊ ريگن جي تجويز تي معاهدي کي START-I جو نالو ڏنو ويو . انهيءَ معاهدي تحت ٻنهي ڌُرين 1 کان 6 هزارن جي انگ ۾ منهنجا ائٽمي هٿيار ضايع ڪيا. هي معاهدو 5-ڊسمبر 2009 تي مُدو پورو ڪرڻ بعد ختم ٿي ويو. ان معاهدي جي تسلسل ۾ اڳتي هلي 3- جنوري 1993ع تي سوويت يونين ۽ آمريڪا هڪ ٻيو معاهدوSTART-II جي نالي سان ڪيو. ان تحت هڪ کنڊ کان ٻئي کنڊ تائين مار ڪندڙ ميزائيلن جو انگ گهٽائڻ تي اتفاق ظاهر ڪيو ويو . اڳتي هلي آمريڪا طرفان ABM ( Anti Ballestic Missile ) معاهدي تان هٿ کڻڻ جي جواب ۾ سوويت يونين به 14-جون 2002ع تي START-II تان هٿ کڻڻ جو اعلان ڪيو. بعد ۾ ٻنهي ملڪن START-III جي نالي سان ائٽمي هٿيارن ۾ وڏي پيماني تي لاٿ آڻڻ جو اعلان ڪيو ، پر سندن وچ ۾ اهڙي اڳڀرائي هيلسنڪي ۾ ٿيل ڳالهين جي دور کان اڳتي وڌي نه سگهي. البت 8- اپريل 2010ع تي روس ۽ آمريڪا وچ ۾ NEW START جي نالي سان ’پراگ‘ جي شهر ۾ هڪ معاهدو ٿيو. ان معاهدي سڀني START ڳالهين کي نظر ۾ رکندي اڳڀرائي ڪئي . ان معاهدي جي نتيجي ۾ ائٽمي هٿيار ڇوڙيندڙ لانچرن جي انگ ۾ اڌو اڌ گهٽتائي آڻڻ ۽ هٿيار چڪاسڻ ۽ تصديق ڪرڻ جي سرشتي کي بهتر بڻائڻ لاءِ راضپو ٿيو. توقع آهي ته اهو معاهدو2021ع تائين جاري رهندو